Топік, вязаны кручком / Crochet topic

У тую ж самую Чарнагорыю, як і купальнік, ездзіў сарафанчык. Я вязала да яго верх - топік, а потым да яго яшчэ прышылі спаднічку. Вязаўся на 48 памер, таму ні манекен, ні мая стройная суседка не змаглі перадаць усю прыгажосць - можна заўважыць складачкі на грудзі. Ніткі стрэйчавыя - таму сядзіць ідэальна! Бонусам ад мяне было ўпрыгожанне на шыю, якое яшчэ можна выкарыстоўваць як бранзалеты. Вяжуцца зусім проста - 2 палосачкі з дзірачкамі, якія паміж сабой пераплятаюцца.

Пад катам фота з дэталямі.

Цэльны чорны вязаны купальнік / Crochet swimsuit

Апошні піск моды - вязаны купальнік! А тут яшчэ і цэльны, ды са стрэйчавых нітак - у носцы ён як сапраўдны, фабрычны. Эластычны, выдатна аблягае фігуру, на пляжы ў такім будзе немагчыма застацца незаўважанай!

 Вязала на заказ для сваёй знаёмай Юліі, яна на гэтым тыдні вярнулася з Чарнагорыі, для адпачынку ў гэтай краіне купальнік і прызначаўся. Я доўга не выкладывала яго тут, спадзявалася на фотакарткі пад пальмамі, але... на іх не хапіла часу ))) Але тое, што Юля выклікала фурор - то гэта адназначна! Да гэтага купальніку яшчэ прыкладаўся бонус - міценкі на нагу, але іх выкладу асобным постам.

Пад катам шмат фота з дэталямі.

Мае новыя ніткі / My new yarn

Зусім нядаўна мая калега па рукадзеллю Аня-Кімулечка хвасталася на сваім блогу аграменнымі ніткамі, купленымі ёю ў Інтэрнэт-краме "КупіКлубок". Мне з той пакупкі перапала толькі 2 маткі, і мой Хамяк мяне грыз і вельмі прасіў такога ж скарбу ў нас дома, у які я магла б запускаць рукі і млець ад шчасця ад дакрананняда да мяккага, прыгожага і якаснага. А яшчэ Хамяк жадаў, каб мае планы на будучае, якія і зараз ужо запісаны ў тры калонкі, з аднаго боку - павялічваліся, з другога - рэалізоўваліся.

І вось мая святочная хвіліна, калі на вошце мне ўручылі мех такіх памераў, з якім св. Мікалай ходзіць на Калядкі, настала! Вось яно - маё багацце (на дадзеныя месяц-два, спадзяюся, бо задаволіць голад Хамяка пасля такога аператывуу будзе ўжо цяжка)!!! Буду радаваць вас усімі сваімі новымі вязалкамі, абяцаю!

Дзіцячае крэсла, перацягнутае джынсам

Новае дзіцячае крэсла з цыраты пачало рвацца вельмі хутка. Каб спыніць разбурэнне, вырашыла абцягнуць яго джынсам. Люблю працаваць з карыстаным джынсам, бо гэта экалагічна - даваць другое жыццё натуральнаму матэрыялу.


Працай сваёй я засталася так задаволена, часта здымаць і мыць не планавала, таму паўстала пытанне пра чахлы. Лянота - рухавік прагрэсу, таму я хадзіла па Сэканд-хэндах і шукала штаны вялікага памеру, з шырынёй штанін не меней 47 см, каб не перашываць іх ))) Атрымалася 2 штукі на змену. Калі-небудзь і прадаць крэсла будзе не сорамна)))) І сын, і котка адразу палюбілі сядзець на ім ))))

Аксэсуары для фотасесіі / Аccessories for a photo session

Вось якія цудоўныя фотакарткі былі зроблены з маімі звязанымі кручком акэсуарамі дзіцячым фатографам Вольгай Гарчычка  з гораду Гродна. І карона, якую я ўжо паказвала тут на маім сыне, і чорны капялюшык так выгодна зайгралі на сапраўдных мадэлях і ў руках фатографа-прафессіянала.

Скураны заплечнік (майстар-клас) / Leather backpack

Не так даўно лазіла па Інтэрнэце па скураных пытаннях і... першы раз у жыцці знайшла сябе!!! Не толькі сваю працу, але і сябе! 5 год назад я пісала некалькі артыкулаў па вязанню і мастацкай апрацоўцы скуры ў газету  "Толока. Делаем сами". І таму, калі я ўбачыла на гэтым сайце свае фотакарткі, у мяне ўзнікла першая думка  - мяне сплагіацілі. Але аказалася, што яны не толькі захавалі аўтарства і першакрыніцу, але і падрэзалі мне галаву на ўсялякі выпадак ))

Перапісываць і перакладаць свой майстар-клас не бачу сэнсу, а вось фотакарткі прымацую. Чытаць тэкст па-расейску тут.

Люблю я вельмі-вельмі свой заплечнік! Служыць ён мне верай і праўдай вось ужо 8 год. Я з ім і на тэлебачанне была запрошана, па ім мяне пазнаюць у горадзе, ён прыцягвае да сябе шмат увагі - так і хочацца ўсім яго патрымаць у руках! З часам колер яго змяніўся, швы трошкі зацёрліся, але хоць ні ў водным месцы ён не быў прашыты на машынцы - ён захаваўся вельмі трывалым. Бачна, што я рабіла яго з любоўю і на доўгае агульнае сяброўскае жыццё )))

Шмат фота з дэталямі пад катам.

Ігольніца-манекен / Needle case "Mannequin"

Для сваёй любімай сястрыцы на Народзіны зрабіла сувенір, які будзе мець для яе вялікае практычнае прызнаначэнне, бо працуе мая сястра ў Менскім Купалаўскім тэатру ў пашывачным цэху канструктарам! Хвалявалася я дужа, бо партніха з мяне ніякая, а замахнулася здзівіць прафесіянала! І якая ж я была шчаслівая, калі пачула, што сястра колькі хвілін у руках манекен круціла, і ўсё думала, што ён у краме куплены ))) Лепшы камплімент для рукадзельніцы )))

Купальнік, вязаны кручком / Crochet swimsuit

Ну вось, да пачатку новага летняга сезону паспела для сваёй сястры Волі зрабіць прэзент - купальнік у яе любімых танах. Блакітны меланжавы я звязала ёй раней, сястра яго насіла. Але зараз у продажы з'явіліся стрэйчавыя ніткі, і мы вырашылі перавязаць трусы, каб яны сталі зручнымі ў нашэнні. Ну, і кветачак давязала, каб спалучыць абедзве часткі.

Мы з сястрой не такія мадэлі, каб сябе выстаўляць публічна, таму фота толькі на манекене )))

Вязаная карона для фотасесіі / Knitted crown for a photoshoot

Як проста стаць прынцам альбо прынцэсай у нашыя дні - ужо не трэба даказываць наяўнасць высокіх тытулаў, дастаткова толькі зрабіць фотасэсію ў адпаведным строі. Можна абыйсціся без вычварных убораў, але ніяк не без кароны. Напрыклад, такой - ажурнай і маленькай, выкананай у высакародным металічным колеры )))

Летняя шапачка, вязаная кручком, са зменнымі кветкамі / Summer crochet сap with removable flowers

На першыя Народзіны сваёй пляменніцы вырашыла парадаваць яе летняй шапачкай са зменнымі кветкамі. Кветкі прымацавала магнітнымі кнопкамі, па-сучаснаму ))

Сын мой, у адрозненне ад іншых дзетак, галаўныя ўборы любіць, - у гэтай шапачцы доўгі час красаваўся перад люстэркам і з радасцю пагадзіўся выступіць у ролі мадэлі, хоць і памер галавы ў яго даўно перарос гадавалыя нормы )))

Такую самую звязала для яшчэ адной гадавалай дамы - дачцэ маёй сяброўкі. Буду чакаць фота )))

Торба, вязаная кручком / Crochet purse

Мая першая торба знайшла сваю гаспадыню - я доўга і старальна працавала над ёю дзеля прэзенту на Народзіны маёй новай, але ў той жа час такой блізкай па духу, сяброўцы Юліі. Торбачка звязана з 36 элементаў, пасаджана на падкладку, мае ўзмоцненыя шнурамі ручкі. Юля засталася давольна абноўкай!

Жоўты шалік у тэхніцы стужкавых карункаў / Yellow scarf in the technique of tape laces

Нядаўна вязала такі ажурны чырвоны шалік для сяброўкі - вядома, захацелася і сабе :) Такога яркага і чыстага жоўтага колеру ў краме была толькі мерсіраваная бавоўна. Ніткі - вельмі прыгожыя!!! 50% віскозы. Але вязанне было жудасным: ніткі слаіліся, і таму працэс вельмі зацягнуўся. Затое вынікам я засталася задаволеная!

Арганайзер для спіц і кручкоў / Knitting needle organizer

Нарэшце!!! Колькі стала парадку на працоўным месцы!!!

Шыццё - адна з нешматлікіх галін рукадзелля, у якой я слабачка. Строчку зрабіць - усё, на што я здатна. Мой 100-гадовы "Зінгер", што перайшоў мне ў спадчыну, часам нават выконвае свой прамы абавязак, акрамя як дапаўняць інтэр'ер :) - дапамагае мне ў маіх намаганнях. Толькі ён змог безпраблемна прастрачыць 8 слаёў джынса!!!

Вязаны кактус "Lophophora" / Crochet cactus

Калі я прэзентавала знаёмай па танцах Юліі падстаўку пад алоўкі, яна пашкадавала іх туды ставіць. Я падстаўку забрала, вырашыла што-небудзь связаць у яе, каб выкарыстоўваць у якасці вазы. І я звязала кактус. А ён прапарцыйна не падыйшоў да вазы, і, такім чынам, у Юліі атрымалася 2 падарунка :)
А кактус - быў падобны на "Astrophytum", але ў таго кветкі жоўтыя. Ну, няхай будзе "Lophophora" (толькі ў яго дзетка не так тырчыць), так цікавей! ))

Шалік у тэхніцы стужкавых карунак / Scarf in the technique of tape laces

Мой першы вопыт вязання стужкавых карунак. Гэты шалік - мой падарунак сяброўцы на 8 сакавіка. Мы з ёй так доўга выбіралі мадэль: я прапаноўвала кветкавыя пышныя ўзоры, але дзяўчыне захацелась нешта болей сціплае, аднатоннае чырвонае. Пасля заўтрашняга ўручэння мы арганізуем фотасэссію ў поўным камплекце - разам з чырвонымі ботамі, торбай, і комплектам чорна-чырвоных браслетаў, якія я прзентавала ёй год назад. Чакаем...

Капялюшык для фотасэсіі / Hat for a photo session

Адна мая знаёмая рукадзельніца у вельмі хуткім часе ў другі раз стане мамай - яна чакае другога сыночка. Разам з яшчэ адной рукадзельніцай, кулінарам і сямейным фатографам у адной асобе, яны  вырашылі замацаваць у памяці гэтыя прыемныя моманты чакання цуду. І вось што ў іх атрымалася:

Я звязала для фотасэсіі капялюшык. А мадэль - гэты аграменны плед, на якім яна ўжо добра набіла руку, і браслеты. Браслеты былі яе першым вопытам вязання спіцамі, а тут яшчэ і ўзор з "косамі", скажу па сакрэту! Маладая мамачка вельмі добрая ўчаніца - апантаная, натхнёная і ўмее вельмі хутка вязаць :)

Сувенір "Падстаўка пад алоўкі" / Pencil holder

Ёсць у мяне знаёмая Юлія, калега па танцах, і працуе яна галоўным бухгалтарам. На Народзіны вельмі мне хацелася зрабіць для Юлі які-небудзь самаробны падарунак. А так як я чалавек вельмі практычны, то і да выбару падарункаў таксама стаўлюся сур'ёзна - каб падарунак не на паліцы пыліўся, а быў у актыўным выкарыстанні. Такім чынам з'явілася падстаўка пад алоўкі і асадкі.

Візітніца са скуры / Leather business card holder

Вельмі мне хацелася павіншаваць з Калядамі маіх сяброў у Польшчы. Вядома, вырашыла прэзентаваць нешта сваё самаробнае. Акрямя агульных падарункаў - елкі і сняжынак, Катажына атрымала мае "фірмовыя" бранзалеты :), а муж яе, Анджэй, імянную візітніцу. Гэта быў мой першы вопыт пасля 5-гадовага перапынку працы са скурай, таму я вельмі хвалявалася, але рэзультат мяне задаволіў.

Шалікі "Dantela"/"Flamenko" / Scarves

Даўно не вязала сабе шалікаў, а павальнае захапленне маіх сябровак вязаннем з пражы "FLAMENKO", прымусіла і мяне падбраць сабе колер. Вось уж праўда: апранула яго і адразу - зорка!

А гэты прыгожы пяшчотны ружовы колер мы з сяброўкай падабралі для яе на вясну ў якасці абноўкі. І атрымалася вось так:

Беларуская паштоўка на Валянцінаў дзень / Belarusian postcard for Valentine's Day

Мая першая паштоўка! І колеры мае любімыя: шакалад і бэж. А катоў люблю таму, што гэта касмічныя стварэнні, яны пасланыя на Зямлю, каб навучыць людзей дабрыні і пяшчоце. Мая Руся шмат чаму добраму навучыла, жывучы са мной. Любові ў першую чаргу. Кахання вам усім, мае сябры і заёмыя, а хоць і незнаёмыя, але няхай і вы будзеце жыць у любові )))

Вязаная шапка для мужа / Knitted hat for my husband

Быў у майго мужа шалік, даўно мною куплены, з модным спалучэннем колераў: шакалад, аліўка, беж, белы. І вельмі ж мне захацелася мужу на Новы Год звязаць шапачку ў камплект - цёмна-шакаладную, але з салатавай каёмачкай. Доўга шукала гэтую нітку для аддзелкі, але ўсё атрымалася! Я засталася вельмі давольна сваёй акуратнай працай, а муж, у сваю чаргу, - сваім падарункам!

ЗЫ: ніткі шакаладнага колеру засталіся, іх хопіць на яшчэ адну шапачку. Можа каму трэба таксама
падабраць пад любімы шалік?!

Вязаныя бранзалеты / Knitted bracelets

Вязаннем бранзалетаў я захапілася з пачатку году, і гэты працэс мне так спадабалася, што праблемы з падарункамі для сябровак ў гэтым годзе не існавала. І нават атрымала сваю першую замову: бежавыя браслеты пад вязаную сукенку.

Сняжынкі, вязаныя кручком / Crochet snowflakes

У гэтым годзе вырашыла навязаць сабе і сваім сябрам ў падарунак сняжынкі. Толькі каб яны зусім не былі падобныя на сурвэткі. Здаецца, атрымалася вельмі рэалістычна. Самае ўдалае іх прызначэнне - падвесіць за дожджыкі да столяў.

Навагоднія флісавыя елкі / Fleece christmas tree